Reshjet e dendura të shiut kanë goditur kryeqytetin e Kilit, Santiago, dhe rajonet përreth, duke shkaktuar rrëshqitje të dheut, përmbytje të banesave dhe dëme të shumta. Të paktën gjashtë persona kanë mbetur të lënduar, ndërsa autoritetet kanë urdhëruar evakuimin e banorëve në zonat e rrezikuara.
Presidenti i Kilit, José Antonio Kast, shpalli gjendjen e emergjencës në Las Condes, një zonë e pasur në lindje të Santiagos, për t’u dhënë institucioneve më shumë kompetenca në përballimin e situatës.
Reshjet e rrëmbyeshme kanë shndërruar rrugët kryesore në rrjedha uji, ndërsa rrëshqitjet e dheut kanë marrë përpara automjete, duke rrezikuar banorët dhe duke shkaktuar dëme materiale, raporton Euronews, përcjell “Bota sot”.
Kryetarja e kësaj zone, Catalina San Martín, bëri të ditur se gjatë ditëve të fundit kanë rënë 14.4 centimetra reshje shiu, rreth nëntë herë më shumë se mesatarja e muajit tetor.
Ajo e përshkroi zonën si tërësisht të mbingopur me ujë, ndërsa situata u përkeqësua edhe nga dalja nga shtrati e lumit Mapocho, i cili përshkon kryeqytetin kilian.
Për shkak të rrezikut nga përmbytjet dhe rrëshqitjet e dheut, autoritetet urdhëruan evakuimin e banorëve në zonat e prekura.
Agjencia kiliane për reagimin ndaj fatkeqësive natyrore vendosi në gatishmëri të lartë edhe 10 zona të tjera të vendit, ndërsa njoftoi mbylljen e shkollave për ditën e premte.
Stuhitë e shiut të ditëve të mëparshme kishin dëmtuar dhjetëra banesa në pjesën qendrore të Kilit dhe kishin lënë afro 12 mijë konsumatorë në Santiago pa energji elektrike.
Sipas autoriteteve, reshjet pritet të dobësohen gjatë së premtes.
Megjithëse nuk janë raportuar viktima deri të enjten, të paktën gjashtë persona kanë mbetur të lënduar. Mes tyre është edhe një fëmijë njëvjeçar, i cili ka pësuar fraktura në kocka.
Ekipet e zjarrfikësve kanë bërë të ditur se kanë shpëtuar ose evakuuar më shumë se 1.000 persona.
El Niño shton shqetësimet për motin ekstrem
Përmbytjet në Kili vijnë në një kohë kur fenomeni klimatik El Niño po forcohet.
Ky fenomen natyror, i karakterizuar nga ngrohja e ujërave tropikale të Oqeanit Paqësor, ndikon në modelet e reshjeve në mbarë botën dhe shpesh sjell pranverë më të lagësht në Hemisferën Jugore.
Organizata Botërore Meteorologjike bëri të ditur të enjten se El Niño i këtij viti pritet të arrijë kulmin në dhjetor dhe mund të jetë ndër më të fuqishmit që nga viti 1950.
Forcimi i këtij fenomeni ka shtuar shqetësimet për shfaqjen e mëtejshme të kushteve ekstreme atmosferike, përfshirë reshjet e dendura, përmbytjet dhe thatësirat në rajone të ndryshme të botës.
Burimi: botasot.info
