Kryetari i Prishtinës, Përparim Rama, është deklaruar për mbylljen për qarkullimin e automjete të rrugicat e Bibliotekës Kombëtare. Ai ka thënë se komuna ka prioritet interesin e përgjithshëm publik dhe nuk mund të vendosë në interes të asnjë biznesi mbi interesin e përgjithshëm të qytetarëve.
“Në cilësinë e Kryetarit të Kryeqytetit kam marrë vendim për mbylljen e qarkullimit të mjeteve motorike në një pjesë të rrugëve ‘Rexhep Luci’ dhe ‘Qamil Hoxha’ si dhe në rrugët e rrugicat të cilat kalojnë nëpër parkun e Universitetit të Prishtinës dhe Bibliotekës Kombëtare.
Nuk do të lejoj që dhjetëra vetura që parkohen në hapësira të përbashkëta publike të privojnë shfrytëzimin e kësaj hapësire në të mirë të të gjithë qytetarëve”, ka shkruar ai.
Krytari Rama ka thënë se qëllimisht nuk e ka marrë këtë vendim derisa është funksionalizuar Parkingu Nëntokësor në Qendër, i cili ka në dispozicion 624 vendparkime për vetura.
