Kryeministri Rama ka reaguar në lidhje me vendimin e pedagogëve për të hyrë në grevë urie nga dita e mërkurë (2 nëntor).
Rama e konisderon këtë vendim si urdhër për t’i dhënë ultimatum qeverisë.
“Grevë urie për rritje rrogash bëjnë vetëm njerëz pa fe e pa atdhe”- shkruan Rama.
Reagimi i plotë:
“Shiksi i NonGratës paska marrë urdhër për t’i dhënë ultimatum qeverisë me grevë urie të pedagogëve! Grevë urie për rritje rrogash bëjnë vetëm njerëz pa fe e pa atdhe, rublaxhinj pa din e pa iman, foltorexhinj e baltaxhinj që vetëm Shqipërisë e shqiptarëve nuk i shërbejnë!”
Vendimi i pedagogëve për grevë urie vjen si përshkallëzim i protestës së tyre me bojkot që ka nisur me fillimin e vitit të ri akademik në universitete.
Pedagogët kanë tre kërkesa kryesore pa plotësimin e të cilave kanë deklaruar se nuk do të tërhiqen : 1.Rritja e pagave 2. Rritja e financimeve për kërkimet shkencore 3.Rivlerësimi i orëve mësimore.
Nga ana tjetër qeveria është shprehur e prerë që nuk do të ketë rritje për pagat e pedagogëve.
Megjithatë protesta e tyre ka qenë e përçarë pasi në disa universitete mësimi është bojkotuar ndërsa në disa të tjera vijon normalisht.
