Kryeministri Edi Rama si duket ka lënë pas të shkuarë me Ramush Haradinajn, duke vendosur të shohin nga e ardhmja. Këtë e kanë treguar fotot që ka ndarë Rama në Facebook, ku shihet në një takim me ish-kryeministrin e Kosovës.
Kujtojmë se më herët kryeministri Edi Rama e paditi ish kryeministrin e Kosovës për “shpifje”. Në padi pretendonte se Haradinaj ka shpifur ndaj Ramës për deklaratat e tij në lidhje me temën e shkëmbimit të territoreve. Në këtë padi përmendeshin disa emisione të transmetuara në të cilat Haradinaj ka folur për këtë temë dhe e ka akuzuar Ramën, që së bashku me Hashim Thaçin dhe Presidentin e Serbisë Aleksandër Vuçiç, kanë nisur idenë e shkëmbimit të territoreve ndërmjet Kosovës dhe Serbisë. Haradinaj nga ana e tij, shkroi se është në dijeni të raportimeve për padinë e kryeministrit Rama dhe do të përgatis një përgjigje në padi. “Unë, sipas ligjit, do të përgatis përgjigje në padi, në afatet e përcaktuara ligjore. Padia e Kryeministrit Rama është plotësisht e pabazuar dhe një diversion politik që bëhet nga ana e tij, që të fshihet pas dramave mediale dhe t’i ikë përgjegjësisë. Kombi ynë dhe Kosova ka njerëz që i dalin zot në çdo kohë”, shkroi në postimin e tij Ramush Haradinaj.
