Prioriteti numër një i Qeverisë është një mjedis i pastër dhe i shëndetshëm. Për këtë qëllim janë siguruar mjete në buxhet në vlerë prej 3.7 milionë euro për projekte ekologjike, përmes Programit për investime në mjedis për vitin 2025 të Ministrisë së Mjedisit dhe Planifikimit Hapësinor. Janë parashikuar 100 milionë denarë për ndërtimin dhe dokumentacionin teknik për sistemet e kanalizimeve dhe impiantet për trajtimin e ujërave të ndotura, 100 milionë denarë për ndërtimin dhe përmirësimin e sistemeve të ujësjellësit, 10 milionë denarë për projekte edukative, kërkimore dhe zhvillimore, si dhe 19 milionë denarë për aktivitete që synojnë rritjen e ndërgjegjësimit publik, edukimin dhe trajnimet që lidhen me mjedisin, thonë nga Qeveria.
“Përmes nxitjes dhe financimit të projekteve që synojnë mbrojtjen, përmirësimin dhe menaxhimin e qëndrueshëm të mjedisit, do të kontribuojmë për një mjedis më të pastër – faktor kyç për një jetë dhe shëndet më cilësor për të gjithë qytetarët. I bëjmë thirrje të gjitha komunave, shoqatave, organizatave civile dhe institucioneve shkencore-edukative të përfshihen aktivisht. Afati për aplikim është tre javë. Informacionet mund të gjenden në faqen zyrtare të Ministrisë së Mjedisit dhe Planifikimit Hapësinor. Ndotja e mjedisit është problem që prek të gjithë qytetarët në mënyrë të barabartë dhe kërkon kohë për zgjidhje të plotë. Prandaj, përmes investimeve në projekte ekologjike, do të sigurojmë një mjedis më të pastër”, thuhet në deklaratën e Qeverisë.
Nga Qeveria theksojnë:
“Një mjedis i pastër dhe shëndeti i qytetarëve mbeten angazhimi ynë.
Problemet e qytetarëve janë edhe problemet tona – ndaj kërkohet një zgjidhje urgjente dhe sistematike.
Qeveria po jep rezultate.”
Burimi: alfax.mk
