Vladimir Putin ka thënë se Rusia do të luftojë për të mbrojtur interesat e saj duke përdorur të gjitha mjetet në dispozicion.
Duke folur në një seancë televizive të Këshillit të tij për të Drejtat e Njeriut, presidenti rus u ankua gjithashtu se Perëndimi e trajtonte Rusinë si një qytetar të klasit të dytë pa të drejtë ekzistence.
Ai gjithashtu u përpoq të shuante thashethemet për një mobilizim të dytë vitin e ardhshëm, duke thënë se nuk kishte nevojë për të kryer një thirrje shtesë, raporton skynews.
Presidenti rus tha se nga 300 mijë rezervistët e mbledhur, rreth 150 mijë u vendosën në zonën e asaj që Moska e quan “operacioni i saj special ushtarak” në Ukrainë.
Rreth 77 mijë ishin në njësi luftarake dhe pjesa tjetër kryenin funksione mbrojtëse, tha ai.
Ndryshe, Rusia ka nisur pushtimin e pajustifikueshëm të shtetit ukrainas më 24 shkurt duke shkaktuar viktima të shumta dhe dëme materiale. /Telegrafi/
Burimi: GAZETA.MK
