Një punonjës i një anëtari demokrat të Dhomës së Përfaqësuesve të SHBA-së u arrestua në Kapitol të hënën, kur gjatë një kontrolli të rregullt të sigurisë gjeti municion në çantën e tij, tha policia e Kapitolit në një deklaratë, shkruan Reuters.
Policia e identifikoi punonjësin si Michael Hopkins, i cili punon për përfaqësuesin Joe Morelle, i cili përfaqëson një qark në veri të Nju Jorkut.
Hopkins u gjet me katër karikatorë municionesh dhe 11 fishekë, tha policia, duke shtuar se nuk iu gjet asnjë armë.
Hopkins nuk mund të kontaktohej për koment të menjëhershëm. Policia e Kapitolit tha në deklaratë se ai u tha oficerëve se kishte harruar që municioni ishte në çantën e tij.
Ai tani po përballet me akuza për posedim të paligjshëm të municioneve, duke përfshirë një akuzë për posedim të një karikatori me kapacitet të lartë.
“Kongresmeni Morelle është i përkushtuar për të siguruar një vend pune të sigurt për të gjithë”, tha në një deklaratë Jo Stiles, shefi i stafit të kongresmenit.
“Aktualisht jemi duke mbledhur më shumë informacion në lidhje me rrethanat e arrestimit. Zyra jonë është plotësisht e angazhuar për të bashkëpunuar me hetimin”, shtoi Stiles.
Burimi: botasot.info
