Punëtorët në fabrikat e Volkswagen në të gjithë Gjermaninë kanë nisur grevat, pasi prodhuesi kërcënoi të mbyllte fabrikat mes kërkesës në rënie dhe një tranzicioni më të ngadaltë se sa pritej te automjetet elektrike.
Punëtorët në turnin e mëngjesit dolën në grevë për dy orë, ndërsa ata në turnin e mbrëmjes planifikojnë të largohen herët nga puna në shenjë proteste ndaj kërkesave të autoprodhuesit, të cilat përfshijnë uljen e pagave me 10 për qind.
Në fabrikën kryesore të Volkswagen në Wolfsburg, e cila ka të punësuar 70,000 njerëz, një grevë dyorëshe do të thotë se disa qindra vetura nuk mund të ndërtohen, thanë burimet e sindikatës.
Përveç Wolfsburgut dhe Hanoverit, të cilët punësojnë 14,000 staf të tjerë, fabrikat e prekura përfshijnë Zwickau, fabrika e VW-së vetëm për vetura elektrike, ku punëtorët do të bëjnë grevë sot dhe nesër.
Është hera e parë që kompania ka kërcënuar të mbyllë fabrikat në Gjermani në historinë e saj 87-vjeçare, ndërsa prodhuesit evropianë luftojnë konkurrencën e huaj, kostot e larta të prodhimit dhe konsumimin e ngadaltë të automjeteve elektrike në kontinent.
Shitjet e veturave VW kanë rënë në Evropë pasi kërkesa ka ngecur dhe konsumatorët i kthehen benzinës. Në nivel global, shitjet në tre muajt e parë të vitit ranë me tre për qind, ndërsa shitjet e motorëve me benzinë u rritën me katër për qind.
Burimi: botasot.info
