Propozimi i pronarit të Pucko Petrol, Asmir Jahoski, për të dalë nga paraburgimi në këmbim të parave, do të merret parasysh vetëm nëse i dyshuari, përveç garancisë që e ofron, depoziton edhe shumën prej 72 milionë denarësh në një llogari të veçantë të gjykatës, informon Prokuroria për ndjekjen e krimit të organizuar dhe korrupsionit. Jahoski ofron garanci prej mbi 60 milionë denarësh, por në mendimin e prokurorisë thuhet se shuma shtesë prej 72 milionë denarësh që kërkohet, korrespondon me përfitimin pasuror të fituar në mënyrë të kundërligjshme nga ana e Jahoskit.
Përveç kësaj, prokurori publik ka kërkuar nga gjykata që ndaj Jahoskit të shqiptohen masa kujdesi, përkatësisht ndalim për të lëshuar vendbanimin, detyrim për paraqitje të herëpashershme tek një person zyrtar si dhe konfiskim i pasaportës. Jahoski është njëri nga 13 të dyshuarit në hetimin për blerjen e mazutit toksik për TEC Negotinë, me ç’rast është shkaktuar dëm në vlerë prej rreth 167 milionë eurosh. /Alsat.mk
Burimi: lajme24.mk
