Komisionerja për Informim dhe Privatësi, Krenare Sogojeva-Dermaku, ka thënë se Partia Socialdemokrate (PSD) gjatë realizimit të aktivitetit të saj ka shpalosur të dhëna personale të qytetarëve të Kosovës, teksa ka paralajmëruar edhe gjobë ndaj tyre
Sogojeva-Dermaku ka thënë se publikimi i të dhënave nëpër peticione është i ndaluar me ligj, dhe si i tillë këtë paralajmërim e kanë dhënë nga viti i kaluar.
“Po fillimisht Agjencia për Informim dhe Privatësi (AIP) qysh në muajin korrik të vitit 2022 ka lëshuar një komunikatë për media dhe një njoftim për qytetarët që shpërndarja e fletëve të peticioneve ku përmbahen këto të dhëna emri, mbiemri, vendi i lindjes, numri personal sidomos por edhe numri i telefonit janë të ndaluara në këndvështrim të Ligjit për Mbrojtjen e të Dhënave Personale. Prandaj ne kemi konsideruar se tashmë sidomos këto kompanitë, institucionet por edhe në këtë rast partitë politike veç janë të vetëdijshme se një diçka e tillë nuk është e lejuar me ligj”, tha Sogojeva-Dermaku.
Ajo tha se që nga largimi i fletëpeticioneve të nënshkruara në vitin 2015, Policia e Kosovës është duke u marrë me to deri në shkatërrimin e tyre.
Ndërsa ka thënë se peticionet e shpërndara nga PSD-ja, janë duke u ruajtur nga Policia e Kosovës. Ajo ka thënë se të njëjta do të asgjësohen.
“Gjithsesi sot ne përmes mediumeve kemi kuptuar se ka një aktivitet të tillë para Qeverisë, ku janë shpërndarë dhe janë publikuar të gjitha ato lista me numra personal dhe numra telefonit, po emra e mbiemra gjithsesi dhe menjëherë kemi dalë në inspektim, kemi inspektuar vendin, janë mbledhë të gjitha ato fletëpeticione dhe të njëjtat nga Policia e Kosovës janë dërguar në një hapësirë brenda zyrës së kryeministrit, domethënë në ndërtesën e Qeverisë dhe të njëjtat janë duke u siguruar dhe ruajtur nga Policia e Kosovës deri në një fazë të shkatërrimit të tyre, pra Ligji për Mbrojtjen e të Dhënave Personale ndalon publikimin e listave të peticioneve, ku përfshihet emri, mbiemri, numri personal, data e lindjes ose nëse nuk është data e lindjes është vendi i lindjes ose vendi adresa ku banon por edhe numri i telefonit”, u shpreh ajo.
Ndër të tjera sa i përket masave që do të merren ndaj Partisë Socialdemokrate, ajo tha se si institucion do të veprojnë në bazë të kompetencave që kanë dhe do të dalin me vendime konkrete.
“Publikimi i listave të tilla e ka tejkaluar qëllimin për të cilin janë mbledhur ato të dhëna, sepse të dhënat janë mbledhur për një qëllim të caktuar dhe asnjëherë të dhënat personale, të cilat mblidhen për qëllimin e caktuar nuk mund të përdoren për një qëllim tjetër dhe në këtë rast kemi përdorim të këtyre të dhënave për një qëllim tjetër, atëherë kemi shkelje të parimit të tejkalimit të qëllimit, por gjithsesi ne si Agjensi do të veprojmë sipas kompetencave tona dhe autorizimeve që parashihen me ligjin në fuqi e pastaj do të dalim me vendimet konkrete”, tha ajo.
