Protestuesit e Shri Lankës refuzuan të largoheshin nga rezidenca e presidentit, Gotabaya Rajapaksa të dielën pasi sulmuan shtëpinë e tij, duke e detyruar atë të ikte dhe të shpallte dorëheqjen e tij.
Qindra mijëra njerëz u mblodhën në Colombo duke kërkuar që Rajapaksa të marrë përgjegjësinë për mungesat e ilaçeve, ushqimit dhe karburantit që kanë gjunjëzuar ekonominë ve vendit.
Ngjarjet dramatike të së shtunës ishin kulmi i protestave disamujore nga njerëzit e tërbuar nga kriza e paprecedentë ekonomike e vendit.
Kryeministri Ranil Wickremesinghe tha se edhe ai do të tërhiqej, për të lejuar formimin e një qeverie të përkohshme nga të gjitha partitë.
Pasi sulmuan portat e pallatit presidencial të epokës koloniale, protestuesit u ulën në dhomat e tij të pasura, duke u futur edhe në pishinën e kompleksit.
Forcat e rendit qëlluan në ajër për të ndihmuar Rajapaksën të arratisej të shtunën.
“Për të siguruar një tranzicion paqësor, presidenti tha se do të largohet më 13 korrik”, tha kryetarja e parlamentit Mahinda Abeywardana në një deklaratë televizive.
Forcat e sigurisë u përpoqën të shpërndanin turmat e mëdha që kishin sulmuar rrethin administrativ të Colombo më herët gjatë ditës, duke shkaktuar përleshje.
Spitali kryesor Kombëtar i Colombo tha se 105 njerëz u sollën të shtunën dhe se 55 mbetën nën trajtim deri të dielën. Mes të plagosurve janë shtatë gazetarë.
“Një person është ende në një gjendje shumë kritike pas një plage me armë zjarri”, tha zëdhënësja Pushpa Soysa për AFP.
Pas mesnatës, oficeri më i lartë ushtarak i Shri Lankës, gjenerali Shavendra Silva, bëri një apel për qetësi.
“Ka një mundësi për të zgjidhur situatën e krizës në mënyrë paqësore dhe kushtetuese”, tha Silva në një fjalim të shkurtër televiziv.
Uashingtoni u kërkoi gjithashtu udhëheqësve të Shri Lankës që të veprojnë shpejt për të kërkuar zgjidhje afatgjata.
Shtetet e Bashkuara i bëjnë thirrje “Parlamentit të Shri Lankës që t’i qaset këtij momenti me një përkushtim për përmirësimin e situates së kombit – jo vetëm të ndonjë parti politike”, tha të dielën një zëdhënës i Departamentit të Shtetit, ndërsa Sekretari i Shtetit Antony Blinken vizitoi Tajlandën.
Protestuesit që ende janë brenda pallatit presidencial thanë të dielën se nuk do të largohen derisa Rajapaksa të largohet nga detyra.
“Lufta jonë nuk ka mbaruar”, u tha gazetarëve udhëheqësi i studentëve Lahiru Weerasekara.
“Kur kaluam në barrierën e fundit, e dinim se ushtria mund të hapte zjarr. Ne rrezikuam jetën tonë”, tha ai.
“Ne nuk do të heqim dorë nga kjo luftë derisa ai të largohet realisht”.
Aktivistët studentorë thanë se gjetën 17.8 milionë rupi (49,000 dollarë) në para të gatshme në dhomën e Rajapaksa dhe ia dorëzuan atë policisë.
Shri Lanka ka vuajtur muaj nga mungesa e produkteve bazë, ndërprerjet e gjata të energjisë elektrike dhe inflacioni galopant.
Qeveria ka dështuar në borxhin e saj të jashtëm prej 51 miliardë dollarësh dhe po kërkon një paketë shpëtimi nga Fondi Monetar Ndërkombëtar.
FMN tha të dielën se shpreson për “një zgjidhje të situatës aktuale që do të lejojë rifillimin e dialogut tonë”.
Shri Lanka pothuajse ka shteruar furnizimet e saj tashmë të pakta me benzinë dhe njerëzit që nuk mund të udhëtonin në kryeqytet mbajtën protesta në qytete të tjera anembanë ishullit të shtunën.
