Polonia ka njoftuar se do të padisë Hungarinë në Gjykatën Evropiane të Drejtësisë për vendimin e saj për t’i dhënë azil politikanit të opozitës polake, Marcin Romanowski, i cili është në kërkim për akuzat për korrupsion.
Njoftimi u bë nga zëvendësministri i Punëve të Jashtme të Polonisë, Andrzej Szejna.
Më 19 dhjetor, Gjykata Rajonale e Varshavës ka lëshuar një Urdhër Arresti Evropian për Romanowskin, ish-zv/ministër i Drejtësisë në qeverinë e partisë “Ligj dhe Drejtësi”. Ky urdhër tashmë i është dërguar Hungarisë.
Ministri i Jashtëm polak ka deklaruar se nëse Hungaria nuk e zbatuar urdhrin e arrestimit, Polonia do ta çojë çështjen në Gjykatë, duke përdorur një nen të traktatit të BE-së që lejon një shtet anëtar të padisë një tjetër për moszbatimin e obligimeve.
Romanowski, në një intervistë, tha se vendimi i Hungarisë për t’i dhënë azil erdhi pasi ai ka bindur autoritetet hungareze mbi krizën e vazhdueshme të sundimit të ligjit në Poloni, raporton Euronews.com.
Ky akt ka shkaktuar një përplasje diplomatike mes dy shteteve. Të dy vendet janë anëtare të Bashkimit Evropian, dhe Polonia beson se veprimi i Budapestit për të ofruar azil politik për Romanowskin është “një veprim kundër parimit themelor të bashkëpunimit besnik”, siç është parashikuar në traktatet e BE-së.
Prokuroria polake akuzon Romanowskin për 11 vepra penale, përfshirë manipulimin e tenderëve dhe keqpërdorimin e fondeve.
Kryeministri polak, Donald Tusk, ka marrë detyrën vitin e kaluar duke u angazhuar për rivendosjen e normave demokratike dhe luftën kundër korrupsionit, që ka mbizotëruar gjatë qeverisjes konservatore të partisë “Ligj dhe Drejtësi”, e cila është aleate me Hungarinë.
Si pjesë e këtij përpjekjeje, qeveria e Tusk kërkon të çojë para drejtësisë disa ish-funksionarë të qeverisë që supozohet se kanë shkelur ligjin gjatë administratës “Ligj dhe Drejtësi” nga viti 2015 deri në 2023.
Burimi: botasot.info
