Penalltia që u akordua për Fiorentinën në fundin e pjesës së parë ndaj Interit, nuk ka kaluar pa polemika. Jo polemika për arsyen pse u akordua me VAR, por pse gjyqtari nuk i tregoi edhe kartonin e kuq Dimarkos pasi ky i fundit i kishte ndërhyrë shumë ashpër Bonaventurës në zonë.
Ish-gjyqtari italian, Luka Mareli, ka shpjeguar për “DAZN” se pse penalltia duhej shoqëruar me kartonin e kuq për lojtarin e Interit në ato momente.
“Faulli i Dimarkos është shumë i shëmtuar, ai ndërhyn në gju.
Mungon kartoni i kuq. Nuk duhet të vlerësojmë mundësinë e pastër për gol, këtu duhet të vlerësojmë shkallën e ndërhyrjes.
Këmba është e lartë, ndërhyn në gju, kjo është një ndërhyrje e rëndë loje që duhej sanksionuar me kartonin e kuq”, tha Mareli.
