Zëvendëskryeministri i Ukrainës ka paralajmëruar njerëzit në pjesë të mëdha të Ukrainës lindore që të evakuohen derisa është ende e mundur.
Iryna Vereshchuk tha se udhëheqësit ushtarakë në rajonet e Kharkiv, Donetsk dhe Luhansk po u kërkonin banorëve vendas të përpiqeshin të largoheshin dhe se ata po bënin gjithçka që mundeshin për ta bërë këtë “në mënyrë të organizuar”, shkruan BBC, transmeton Bota sot.
Nëse njerëzit nuk largoheshin, tha ajo, së shpejti do ta gjenin veten nën zjarr dhe nën kërcënimin e vdekjes.
“Nuk mund të bëjnë asgjë kundër kësaj dhe ne nuk do të jemi në gjendje t’i ndihmojmë ata,” shtoi ajo.
Rusia ka thënë se po ripërqendron operacionet e saj ushtarake në Donbas, që përfshin rajonet Donetsk dhe Luhansk. Kharkiv, qyteti i dytë i Ukrainës, është afër kufirit rus dhe është shënjestruar nga forcat ruse që nga fillimi i luftës.
