Sofje, 6 shkurt – Ish presidenti bullgar, Rosen Plevneliev, në një intervistë për BTV ka deklaruar se Serbia nuk do të lejojë asnjëherë që Maqedonia e Veriut të anëtarësohet në Bashkimin Evropian para tyre, dhe para se të rregullojnë pozitën e tyre gjeopolitike, e kjo e fundit sipas tij, është e copëtuar mes Rusisë dhe Bashkimit Evropian, transmeton Zhurnal.
“Serbia do të bëjë gjithçka që mundet që të pengojë procesin e bisedimeve për hyrje të Republikës së Maqedonisë së Veriut në Bashkimin Evropian para se ta bëjnë vet këtë. E shohim se vet Serbia ende po lëkundet mes orbitave të Rusisë dhe Evropës”, deklaroi Plevneliev.
Sipas tij, qeveria e RMV-së qëndron e varur dhe situata e saj nuk është e lehtë. Për këtë, pozita bullgare duhet të jetë ndihmë për eurointegrimet e RMV-së.
“Duhet të kemi politikë balansuese, ne në Bullgari duhet të kemi kujdes të mos bëjmë provokime. Duhet të sillemi si të rritur, duhet ta dijmë se është luftë e vështirë të heqim dorë nga e kaluara fashiste tito-stalinistike. Për fat të keq, elitat e sotme në RMV ende vuajnë nga kjo”, sqaroi Plevneliev i cili ishte president i Bullgarisë nga viti 2012 deri në vitin 2017./Zhurnal.mk
Burimi: zhurnal.mk
