Forcat ukrainase filluan një përpjekje të re për të çliruar provincën Kherson nga kontrolli rus, megjithëse nuk është ende e qartë se sa të ashpra janë luftimet për rajonin.
Zëvendëskreu i Khersonit, i instaluar nga Rusia, Kirill Stremousov raportoi zjarr artilerie, ndërsa Ministria ruse e Mbrojtjes tha se kishte shmangur një sulm.
Megjithatë, blogerët ushtarakë rusë raportuan për luftime të vazhdueshme dhe të ashpra për kontrollin e territorit, ndërkohë që shtuan se pala ukrainase kishte vendosur tanke dhe automjete të blinduara.
Pjesa më e madhe e luftimeve është përqendruar në përpjekjet për të kontrolluar Dudchany dhe Mylove, si dhe brigjet veriperëndimore të lumit Dnipro, aktualisht nën kontrollin rus.
”Kherson ka qenë një ndër objektivat e sulmeve raketore dhe ajrore të Moskës gjatë gjithë ditës”, tha Shtabi i Përgjithshëm ukrainas.
”Avionët sulmuan 17 herë ndërsa forcat ruse vendosën raketahedhës 10 herë duke goditur më shumë se 20 vendbanime, përfshirë Ivanivka në rajonin Kherson. Moska hapi zjarr edhe në Zaporizhia”, tha ai.
Sulmet ajrore të së shtunës ishin më pak intensive se në fillim të javës, kur më shumë se 80 raketa ruse goditën objektivat në mbarë vendin.
