Pamjet me dron tregojnë tre makina duke ecur me shpejtësi përgjatë një rruge kryesore të zbrazët jashtë kryeqytetit ukrainas Kiev, kur papritur kthehen dhe vrapojnë prapa – të gjitha përveç njërës, raporton BBC, transmeton Bota sot.
Kjo makinë e bardhë kthehet, por më pas ndalon. Një burrë del jashtë dhe ngre duart. Pastaj trupi i tij bie në tokë. Pak çaste më vonë, ushtarët rusë afrohen. Një grua e moshuar dhe një fëmijë lënë makinën dhe një ushtar i largon ata.
Njeriu në tokë ishte Maksim Iovenko. 31-vjeçari u qëllua për vdekje nga forcat ruse që ishin pozicionuar buzë rrugës. U vra edhe gruaja e tij Ksenia, e cila ndodhej në makinë.
Djali i tyre gjashtëvjeçar dhe shoqja e moshuar e familjes që ishin me ta kanë shpëtuar, ndonëse ajo ka mbetur e plagosur dhe ndodhet në spital. (Të dyja familjet na kërkuan të mos i përmendim.)
“Derisa pashë videon, kisha ende pak shpresë,” i thotë babai i Maksim Sergiy Iovenko për BBC në Kiev, ku ai jeton. “Unë shpresoja se ai ishte gjallë.”.
Incidenti ndodhi më 7 mars, kur Maksim dhe familja e tij iu bashkuan një kolone prej rreth 10 makinash civilësh që përpiqeshin të arrinin në Kiev nga periferia perëndimore e qytetit, i cili ishte kthyer në një zonë konflikti.
Ai u filmua nga një grup i mbrojtjes territoriale ukrainase duke bërë zbulim ajror dhe u shpërnda gjerësisht.
Kur një mik i Maksimit, i cili ishte pjesë e autokolonës, i telefonoi Sergiy-t për t’i treguar lajmin, Sergiy thotë se ai menjëherë e kuptoi se diçka nuk shkonte. Kur ai e mori telefonin ra heshtja dhe më në fund miku i tha: “Qëndroni fort, iku djali dhe nusja”.
Maksim jetonte në Kiev dhe punonte për një agjenci udhëtimesh, ku u takuan ai dhe Ksenia. Sergiy e përshkruan djalin e tij si një burrë familjar me një zemër të mirë që i pëlqente të këndonte karaoke. Por hobi i tij më i madh ishte familja, thotë ai. Ai e donte shumë djalin e tij dhe ky ishte pasioni i tij.
