Gjykata Evropiane në Luksemburg ka konfirmuar vendimin e Bashkimit Evropian për ndalimin e transmetimit të medias shtetërore Russia Today – RT France.
Kjo masë ishte vendosur në muajin mars për shkak të përhapjes së dezinformatave dhe propagandës të Kremlinit në lidhje me pushtimin e paprecedent rus të Ukrainës.
“Dhoma e Gjykatës së Përgjithshme refuzon kërkesën e RT France për anulimin e akteve të Këshillit, të miratuara pas nisjes së luftës në Ukrainë, e cila e ndalon përkohësisht organizatën të transmetojë përmbajtjen e saj”, thuhet në njoftim.
Po ashtu, sipas Gjykatës vendimi i saj bazohej në faktin se sanksionet ishin të përkohshme dhe konstatoi se ato ishin “të përshtatshme dhe të nevojshme për objektivat e ndjekura” duke pasur parasysh “kontekstin e jashtëzakonshëm”.
Shumë gazetarë të huaj janë larguar nga Rusia dhe një numër i mediave kanë pezulluar operacionet e tyre pasi autoritetet në Moskë vendosën dënime me burg deri në 15 vjet për përhapjen e “lajmeve të rreme” për ushtrinë ruse.
Si pjesë e një pakete të gjerë të sanksioneve kundër Kremlinit për shkak të pushtimit të Ukrainës në mars, Bashkimi Evropian pezulloi transmetimin e mediave ruse Sputnik dhe RT.
Më 30 mars, Gjykata Evropiane hodhi poshtë gjithashtu kërkesën e transmetuesit rus RT të kontrolluar nga Kremlini për të hequr përkohësisht ndalimin e transmetimeve në gjuhën franceze.
Russia Today, e cila financohet nga Rusia, u themelua në vitin 2005 dhe ka faqe interneti në shumë gjuhë, duke përfshirë anglisht, frëngjisht, spanjisht dhe arabisht.
Kanali është i ndaluar në disa vende, duke përfshirë ish-republikat sovjetike të Lituanisë dhe Letonisë.
Në Shtetet e Bashkuara iu kërkua të regjistrohej si agjent i huaj dhe autoritetet britanike ia hoqën licencën e transmetimit.
