Arbër Ademi nga BDI ka reaguar pas akuzave të VLEN-it se Gjykata Kushtetuese, e cila duhet të shqyrtojë kushtetueshmërinë e Ligjit për përdorimin e gjuhëve – gjuhës shqipe, është nën direktiva të BDI-së dhe se shfuqizimi i Ligjit, ka për qëllim destabilizimin e vendit, transmeton TV21.
Ademi, këto akuza i cilëson si dezinformata dhe i sheh si “parapërgatitje të terrenit për nënshtrimin e radhës”.
Shtoi se kryetari aktual i Kushtetueses, është propozim i ish presidentit të shtetit, Gjorçe Ivanov nga VMRO-DPMNE-ja dhe se mendimi i Komisionit të Venecias nuk mund të jetë arsyetim për shfuqizimin e shqipes si gjuhë zyrtare.
Reagimi i plotë i Arbër Ademit pa ndërhyrje:
Të thuash se Gjykata Kushtetuese është e BDI-së dhe LSDM-së është jo vetëm dezinformatë e pastër, por edhe qëndrim tejet i papërgjegjshëm, si dhe përgatitje të terenit për nënshtriminin e radhës.
Krerët e VLEN-it e dinë se kryetari i Gjykatës Kushtetuese, Darko Kostadinovski, ai që paralajmëroi shfuqizimin e Ligjit për përdorimin e gjuhëve, është gjykatës kushtetues si propozim i ish-presidentit Gjorgje Ivanov nga VMRO-DPMNE, partnerit aktual të VLEN-it. Pikërisht pas fitores së VMRO-së, konkretisht në qershor të këtij viti, zgjidhet Kryetar i këtij institucioni, gjë që flet për atë se cili është disponimi i shumicës së anëtarëve në Gjykatën Kushtetuese.
E dyta, mendimi i Komisionit të Venecias nuk mund të jetë arsyetim për shfuqizimin e Ligjit, pasi ky Komision nuk është institucion që punon me ligje të Maqedonisë së Veriut dhe më kryesorja, Komisioni i Venecias nuk është institucion vendimmarrës!
Fundja, anëtare e Komisionit të Venecias kur u kontestuan nenet e Ligjit ishte Tanja Karakamisheva, anëtare e Këshillit Ekzekutiv të VMRO-së, partnerit aktual të VLEN-it.
E treta, nuk kanë qenë të rastësishme akuzat se BDI po përgatitet për destabilizimin e shtetit. Të nderuar, destabilizimin e keni paralajmëruar sa për të mjegulluar opinionin sepse e keni ditur se pas Balancuesit, VMRO do të prek edhe gjuhën shqipe, mbase keni përgatitur edhe ndonjë goditje tjetër përfundimtare për vetë Marrëveshjen e Ohrit në tërësi. Vet paralajmëruat destabilizim, vet po e destabilizoni situatën.
Burimi: tv21
