Një punëtor i KRM “Pastrimi”, është ankuar se paga e tij nuk është ekzekutuar për muajin mars.
Për redaksinë e Klankosova.tv, ai tha se në festat e Bajramit, pagat dalin gjithnjë më herët, por kjo nuk ndodhi këtë muaj.
Megjithatë në një përgjigje për median, zëdhënesja e kompanisë “Pastrimi” thotë se pagat nuk u ekzektuan për shkak që data 1 prill ka qëlluar në ditë feste.
“Kompania “Pastrimi”, procesin e përgatitjes së pagave e fillon nga dita 01 e muajit, mirëpo meqenëse dita 1 e muajit ka qenë festë përgatitja ka filluar me ditën e dytë dhe pagat i nënshtrohen procesit të kalkulimit të orëve shtesë, orëve të natës dhe ditëve të festave sipas Ligjit, sepse jemi pothuajse nga ndërmarrjet e pakta që i paguajmë edhe orët shtesë apo festat”, tha zëdhënësja e kompanisë, Arbënorë Ademi.
“Bazuar në Rregulloren e Kompanisë për paga është e përcaktuar që:
”Paga mujore paguhet së paku një herë në muaj dhe këtë më së largu deri në datën 7 të muajit vijues të ardhshëm, përvec në rastet kur kompania mund të ketë probleme të thella financiare, por jo më gjatë se data 15 e muajit. Pra, deri me dt. 7, kalkulimi i tyre bëhet dhe pagat do të ekzekutohen tek secili punëtor sipas përcaktimit ligjor”, thuhet në përgjigje.
“Ndërsa sa i përket çështjeve të pagave para festes se bajramit nuk është e përcaktuar me rregulloren e pagave, madje në bazë të rregullores duhet të ekzekutojmë pagat një herë në muaj dhe atë në muajin pasues. Në të kaluarën varësisht nga stabiliteti financiar kemi dhënë vetëm shpërblim apo bonus lidhur me ndonjë festë eventuale, dhe atë vetëm përmes vendimit të Bordit të Drejtorëve”.
Burimi: botasot.info
