Partia Liberale Egjiptiane e përkrah “Fondin e Sigurisë”, të themeluar nga Qeveria e Kosovës.
Kryetari i PLE-së, Veton Berisha, tha se për shkak se ky komunitet nuk qëndron mirë ekonomikisht, kontributin për sigurinë e Kosovës do ta japin në forma të tjera, përmes angazhimit të drejtpërdrejtë në Ushtrinë e Kosovës.
Berisha tha se 500 të rinj dhe të reja janë të gatshëm që t’i bashkëngjiten Forcës së Sigurisë së Kosovës.
“Ne, egjiptianët e Kosovës, e mbështesim Fondin e Sigurisë nga Qeveria Kurti dhe i bëjmë ftesë secilit nga komuniteti egjiptian në Kosovë dhe diasporë që brenda mundësive të kontribuojnë në këtë fond, mirëpo duke e ditur se gjendja ekonomike e komunitetit është e dobët dhe duke e ditur që shumica e kanë të pamundur të kontribuojnë financiarisht në këtë fond dhe duke vlerësuar që numri i pjesëtarëve nga komuniteti egjiptian në Forcën e Sigurisë së Kosovës është shumë i vogël, ne si komunitet egjiptian ofrojmë rreth 500 të rinj dhe të reja me edukim të avancuar për t’iu bashkëngjitur Forcës së Sigurisë së Kosovës”.
Ndryshe, në dy ditët e para të themelimit të “Fondit të Sigurisë”, shumë ndërmarrje, personalitete dhe qytetarë kanë dhënë kontributin e tyre.
