Parlamenti i Suedisë ka miratuar një projektligj të ri të mbështetur nga qeveria, i cili sjell ndryshime të rëndësishme në politikën e migracionit, duke hequr mundësinë e lejeve të qëndrimit të përhershëm për refugjatët dhe disa kategori të tjera migrantësh.
Sipas raportimeve të Radio Suedisë, legjislacioni i ri parashikon që nga data 12 korrik azilkërkuesve dhe grupeve të caktuara t’u jepen vetëm leje të përkohshme qëndrimi.
Megjithëse lejet e përkohshme tashmë janë praktikë standarde në Suedi, reforma e re i përjashton këto grupe nga mundësia për të aplikuar në të ardhmen për leje të përhershme.
Autoritetet suedeze kanë sqaruar se ndryshimet nuk prekin personat që tashmë mbajnë leje të qëndrimit të përhershëm.
Projektligji është miratuar nga parlamenti të martën dhe konsiderohet pjesë e një pakete më të gjerë reformash për shtrëngimin e politikave të migracionit në vend.
Ky vendim pritet të ketë ndikim të madh në sistemin e azilit dhe integrimit të migrantëve në Suedi.
Burimi: botasot.info
