Anëtarët e komunitetit kurd në Paris zhvilluan një marshim të heshtur për të kujtuar viktimat që u vranë pas një sulmi me armë zjarri. Autoritetet franceze thonë se personi i cili dyshohet se vrau tre pjestarë të komunitetit kurd e plagosi tre të tjerë, u ka thënë hetuesve, se ai ishte nisur me synimin për të vrarë imigrantë ose të huaj, e më pas veten.
Anëtarët e komunitetit kurd në Paris zhvilluan një marshim në heshtje, për të kujtuar tre viktimat që u vranë pas një sulmi me armë zjarri në një qendër kulturore kurde, në kryeqytetin francez.
Një 69-vjeçar është arrestuar si i dyshuar për sulmin dhe po mbahet në paraburgim. Ndaj tij rëndojnë disa akuza, për vrasje dhe tentativë për vrasje. I dyshuari u tha hetuesve se ai synonte në mënyrë specifike të vriste emigrantë ose të huaj dhe më pas kishte planifikuar të vriste veten. Ai u kishte thënë gjithashtu atyre se kishte një urrejtje “patologjike” ndaj të huajve jo-evropianë.
69-vjeçari u mbajt për një kohë të shkurtër nën kujdesin psikiatrik, por më pas u zhvendos në paraburgim ndërsa të hënën doli para gjykatës.
“Këto vrasje kanë karakter politik e terrorist. Askush nuk duhet të presë që ne të besojmë versionin se ky është një akt i izoluar”, thotë Agit Polat, zëdhënës i Këshillit Demokratik të Kurdëve në Francë.
“Për mendimin tim, nuk është një akt i izoluar. Mendoj se ishte e përgatitur mirë dhe e drejtuar kundër kurdëve. Shumë fakte e tregojnë këtë. Ai ishte në burg dhe dhjetë ditë më vonë kishte një armë dhe e dinte ku dhe në çfarë ore të shkonte”, thotë një protestues 24-vjeçar.
“Çdo ditë pyesim veten se kur dikush do të qëllojë mbi ne sërish. Dhjetë vjet më parë, ne u sulmuam në zemër të Parisit dhe dhjetë vjet më vonë përsëri… në një qendër kulturore që monitorohet nga autoritetet franceze. Pse nuk u bë asgjë për të na mbrojtur?!”, thotë 22-vjeçari Dagan Dogan.
Prokurorët kanë bërë të ditur se kanë kontrolluar kompjuterin dhe telefonin e autorit të sulmit, por nuk kanë gjetur ndonjë lidhje të konfirmuar të tij me grupe që përfaqësojnë ideologji ekstremiste./VOA
Burimi: GAZETA.MK
