Papa Françesku telefonoi presidentin ukrainas Volodymyr Zelenskiy të shtunën dhe shprehu “dhimbjen e tij më të thellë” për vuajtjet e vendit, tha ambasada e Ukrainës në Vatikan.
Ambasada njoftoi bisedën në një postim në Twitter dhe një zyrtar i ambasadës i tha Reuters se biseda u zhvillua dje rreth orës 16:00, por nuk mund të zbulonte detaje të mëtejshme.
“Ati i Shenjtë shprehu dhimbjen e tij më të thellë për ngjarjet tragjike që po ndodhin në vendin tonë”, shkruan ambasada në Twitter.
Vatikani konfirmoi thirrjen dhe në postimin e tij në Twitter, Zelenskiy tha se falënderoi Papën “për lutjen për paqen në Ukrainë dhe një armëpushim. Populli ukrainas ndjen mbështetjen shpirtërore të Shenjtërisë së Tij”.
Biseda u zhvillua një ditë pasi Papa bëri një vizitë të papritur në ambasadën ruse për t’ia transmetuar shqetësimin e tij për pushtimin rus të Ukrainës tek ambasadorja e Moskës, në një largim të paprecedentë nga protokolli diplomatik.
Ambasadori rus mohoi një raportim të mediave argjentinase se Papa, 85 vjeç, kishte ofruar ndërmjetësimin e Vatikanit.
Gjithashtu të premten, Papa thirri kryepeshkopin Sviatoslav Shevchuk, udhëheqësin e katolikëve të ritit lindor të Ukrainës, i cili është zotuar të mos largohet nga Kievi dhe që ka hapur bodrumin e katedrales së tij si një strehë për bomba. Zyra e Shevchuk në Romë tha se Papa i tha kryepeshkopit “Unë do të bëj gjithçka që mundem” për të ndihmuar.
