Paga minimale do të rritet sipas ligjit me 1.800 denarë. Në një mbledhje qeveritare do të konfirmohet shuma më e ulët që punëdhënësi është i detyruar të paguajë, e cila do të jetë 24.400 denarë. Edhe pse ligji parashikon që paga minimale të përcaktohet pas një konsultimi me Këshillin Socio-Ekonomik, një takim i tillë ende nuk është caktuar, pasi komisioni qeveritar ende nuk e ka përcaktuar përfaqësueshmërinë e Sindikatës.
“Ka një ligj në fuqi, të cilin sindikata dhe punëdhënësit e kanë nënshkruar dhe janë dakorduar që deri në fund të këtij muaji të bëhen llogaritjet për pagesën e pagës minimale. Komisioni për përcaktimin e përfaqësueshmërisë duhet të vendosë se cila sindikatë është përfaqësuese dhe menjëherë më pas do ta caktojmë takimin e Këshillit Socio-Ekonomik,” deklaroi ministri i Ekonomisë, Besar Durmishi.
Llogaritjet për pagat dorëzohen nga data 1 deri më 10, në mënyrë që pagesat të mund të realizohen deri më 15. Meqë firmave u kanë mbetur edhe 5 ditë për t’i dërguar llogaritjet në DAP, ndërsa paga e marsit duhet të jetë më e lartë, u vendos ky zgjidhje. Nëse më vonë arrihet marrëveshje për një pagë minimale më të lartë, kryeministri tha se qeveria do ta ndryshojë ligjin dhe do t’i rrisë pagat.
“Nuk ka problem, ne do ta ndryshojmë ligjin dhe do të bëjmë një rregullim shtesë,” deklaroi kryeministri Mickoski.
Paga minimale përcaktohet çdo vit në mars, në nivelin e 50% të pagës mesatare të paguar në dhjetor dhe 50% të rritjes së kostos së jetesës. Sipas llogaritjeve statistikore, paga më e ulët në shtet duhet të rritet me 1.800 denarë. Kërkesa e Sindikatës ishte që ajo të rritej me 6.000 denarë shtesë, pra të arrinte 500 euro, me kusht që shteti të mbulonte dallimin në kontributet për një vit.
Burimi: alfax.mk
