Ministri i Punëve të Jashtme Bujar Osmani sot informoi se para gjysmë ore kanë arritur t’i tërheqin diplomatët tanë në Ukrainë përmes një korridori sigurie dhe ata tashmë janë nisur për në Moldavi.
“Situata, sidomos natën në Kiev, është përkeqësuar. Ne vendosëm të evakuonim diplomatët tanë në ditën e agresionit rus në Ukrainë, por për shkak të rrethanave të vështira ata nuk mundën të largoheshin nga ambasada. Ata ishin fshehur gjatë gjithë kësaj kohe. Më pas kemi bërë disa koordinime me partnerët tanë dhe kemi arritur të evakuojmë diplomatët tanë përmes korridorit të sigurisë para gjysmë ore dhe ata tashmë janë nisur për në Moldavi”, tha Osmani.
Ministri bëri me dije se sot kanë arritur të nisin procesin e evakuimit të 30 vëzhguesve tanë në kuadër të Misionit të Posaçëm Monitorues. Disa prej tyre, siç tha ai, aktualisht janë nisur drejt Moldavisë, e një pjesë e tyre në Poloni.
“Ata sapo janë larguar, nuk mund të them se cilat janë ato aranzhime për arsye sigurie, por ata tashmë janë nisur me një kolonë për t’u larguar nga Ukraina”, tha Osmani.
Duke iu përgjigjur pyetjeve të gazetarëve, Osmani theksoi se familjarët e diplomatëve i kanë kthyer dy javë më parë, ndërsa diplomatët kanë qëndruar që të largohen të fundit, sepse e rëndësishme ka qenë që fillimisht të dalin qytetarët e më pas diplomatët.
“Prandaj deri në momentin e fundit pas fillimit të aktiviteteve ushtarake atje, diplomatët nga vendi i fshehjes u jepnin shtetasve dokumente udhëtimi në forma të ndryshme, por megjithatë dje morëm vendim që ata të evakuohen në mënyrë të sigurt. Ata arritën ta bëjnë këtë sot. Bëhet fjalë për dy diplomatë dhe dy shtetas të tjerë që ishin bashkë diplomatët në Ambasadë, shtetasit tanë. Një familje shoqërohet aksidentalisht nga një pjesë e misionit monitorues të OSBE-së që shkon në Moldavi, ne jemi në komunikim me qytetarët e tjerë për të gjetur një mënyrë për t’i nxjerrë jashtë, duke përfshirë familjet e qytetarëve tanë që janë shtetas ukrainas. Ka qytetarë tanë që janë të martuar me qytetarë të Ukrainës, ka kaluar një vendim i Qeverisë që familjeve të tyre të strehohen në vend, por fillimisht duhet të sigurohet një korridor sigurie për evakuim”, tha Osmani.
Ministri shtoi se kanë marrë një kërkesë nga Ukraina për ndihmë specifike, kryesisht në njësi gjaku, pajisje mjekësore dhe barna, por edhe mjete të tjera që janë të koordinuara në vend përmes Mekanizmit të Mbrojtjes Civile të NATO-s dhe BE-së.
Konkretisht, siç theksoi ai, Republika e Maqedonisë së Veriut në seancën e djeshme të Qeverisë ka vendosur që t’i bashkohet pakos së sanksioneve të BE-së kundër qëllimeve të synuara ekonomike dhe politike në Federatën Ruse, por gjithashtu ka vendosur t’i bashkohet të gjitha masave kufizuese të miratuara nga BE-ja nga 2014 e tutje, me të cilën, siç theksoi, është arritur harmonizimi 100% i politikës së jashtme dhe të sigurisë së Republikës së Maqedonisë së Veriut me BE-në.
