Në iniciativën e themelimit të Lëvizjes së re, Izet Mexhiti ka gjetur përkrahje nga partitë opozitare shqiptare. Ish anëtari i Lëvizjes Besa, aktualisht deputet i pavarur, Kastriot Rexhepi për TV21 ka konfirmuar se do të jetë pjesë njëherit edhe themelues i lëvizjes politike në krye me Mexhitin.
“E kam mbështetur gjatë procesit të, të themi luftës politike të tij të brendshme, gjithashtu do të vazhdojë që ta mbështes në rrugëtimin e tij dhe me gjitha gjasat do të jem edhe një nga themeluesit e lëvizjes së re politike.”- deklaroi Kastriot Rexhepi – deputet i pavarur.
Edhe deputeti tjetër i pavarur, Skender Rexhepi-Zejdi thotë se nuk ka asnjë pengesë për bashkëpunim me Mexhitin, në kuadër të subjektit të ri politik.
“Kam komunikim mjaft të mirë me Izet Mexhitin, sikur që kam komunikim edhe me subjekte tjera politike, por vendimin definitiv do e sjellim pas asaj që planifikojmë të mbajmë, Kongresin Popullor, bashkërisht.”- tha Skender Rexhepi – Zejd – deputet i paavrur.
Lëvizja Besa konfirmon se është në komunikim me ish-anëtarin e fraksionit të BDI-së.
“Ne jemi të hapur të bisedojmë, komunikim kemi me anëtarët e grupit të zjarrit të cilët tani dëshirojnë që të themelojnë subjekt politik. Për hapat e mëtutjshme do të njoftoheni me kohë.”- pohoi Abdush Demiri – Lëvizja Besa.
Nga partia e Afrim Gashit, Alternativa thonë se është koha për bashkëpunim opozitar dhe “tejkalim të vetvetes”.
“Jemi te gatshëm te bashkëpunojmë me të gjitha subjektet politike opozitare shqiptare, të cilat shfaqin gatishmëri për të formuar front të gjerë opozitar në funksion të ndryshimit pozitiv të skenës politike shqiptare. Ka ardhur koha që shqiptarët të çlirohen nga politikat korruptive të partive “Soravia” dhe të shpëtojnë nga politikanët “non grata”- thanë nga Alternativa.
Ndryshe tashmë Besa dhe Alternativa kanë zhvilluar takime për formimin e frontit opozitar.
Burimi: TV21
