Rajoni i Ohrit, si vlerë universale, mbetet në Listën e Trashëgimisë Botërore të UNESCO-s, njoftoi qeveria. Siç thonë nga atje, ky vendim është bërë i ditur në seancën e 45-të të Komitetit të Trashëgimisë Botërore të UNESCO-s, që mbahet në Riad të Arabisë Saudite. Komiteti respektoi përpjekjet e përbashkëta të Maqedonisë së Veriut dhe Shqipërisë për të ruajtur statusin prestigjioz të Rajonit të Ohrit si trashëgimi botërore. Në seancën në Riad janë Ministrja e Kulturës, Bisera Kostadinovska-Stojçevska dhe ajo e Mjedisit dhe Planifikimit Hapësinor, Kaja Shukova. Dy ministret theksuan se ekipet e ekspertëve nga Maqedonia e Veriut dhe Shqipëria kanë përgatitur një Plan Strategjik për rehabilitimin e trashëgimisë natyrore dhe kulturore të Rajonit të Ohrit me një Plan Veprimi, i cili është një hap i rëndësishëm në zbulimin dhe trajtimin e faktorëve që kanë ndikim negativ në rajonin e Ohrit. Kjo është vlerësuar pozitivisht nga Komiteti i Trashëgimisë Botërore dhe është vënë në dukje në Vendimin e seancës së Komitetit në Riad.
Burimi: TV21
