Mbi 2500 objekte shëndetësore janë në krizë ekzistenciale dhe afër falimentimit. Mjekët familjarë për 63 denarë në muaj, duhet të japin shërbime të pakufizuara 24 orë, në 7 ditët e javës. Nuk ka respekt për marrëdhëniet e punës, thonë Oda e Mjekëve Privatë, të cilët kërkojnë bisedime me autoritetet kompetente që të tejkalohet, siç thonë ata, problemi rreth minimizimit dhe zhvlerësimit të vazhdueshëm të punës së profesionistëve shëndetësorë – mjekëve amë, gjinekologëve, stomatologëve dhe farmacistëve.
“Duhet urgjentisht Fondi Shëndetësor të sigurojë një ekip negociator që të bëjmë dialog e jo monolog dhe t’i çojmë gjërat përpara. Në të kundërtën, shteti le të dalë dhe le të thotë nuk kemi nevojë për mjekë. Me mosmbështetje do të shkatërrohet ky biznes i vogël dhe kjo nuk është mirë për popullin. Tashmë ka njoftime për mbylljen e klinikave shëndetësore, sidomos në zona më të vogla.”,- deklaroi kryetarja e Odës së Mjekëve Privatë, Tanja Dejanovska.
Sa u përket harxhimeve të miliona eurove nga ana e qytetarëve për teste Kovid nëpër klinikat private, nga Oda e Mjekëve Privatë thonë se çmimet i dikton tregu. Nga 4500 klinika vetëm 10 deri në 20 klinika kryejnë teste Covid.
“Të gjitha kostot janë rritur nga 80 deri në 100% disa deri në 200%. Për shembull nëse ne i kemi marrë dorëzat 160 denarë para pandemisë, aktualisht çmimi minimal është 650 denarë.”,- theksoi pronarja e një barnatoreje, Marija Fidanovska.
Sipas OMP pandemia ju ka dhënë një goditje të fortë. Oda e Mjekëve Privatë, njoftoi se nga java e ardhshme do të fillojnë të funksionojnë grupet e punës dhe ekipet negociuese me ekspertë juridikë dhe ekonomikë. Në vend ka rreth 4500 institucione shëndetësore private.
