Një anije tregtare me flamur të huaj, është goditur nga një raketë ruse në qytetin port të Mariupol të rrethuar në jug të Ukrainës.
Kështu tha sot një zyrtar ukrainas, raporton Sky News, përcjell Bota sot.
Ukraina tha se po përgatitej që rreth 60,000 rezervistë rusë të thirreshin për të përforcuar ofensivën e Moskës në lindje, ku objektivat kryesore të Rusisë kanë përfshirë Mariupolin dhe Kharkivin, qytetin e dytë më të madh të vendit.
Dhoma e motorit të anijes së ngarkesave me flamur Dominika Azburg u godit nga një raketë e lëshuar nga marina ruse vonë të hënën, tha Viktor Vyshnov, nënkryetari i Administratës Detare të Ukrainës.
“Anija u dogj dhe të 12 anëtarët e ekuipazhit u evakuuan në një anije tjetër. Një anëtar i ekuipazhit kishte nevojë për ndihmë mjekësore që iu dha dhe ai u evakuua”, tha ai për Reuters.
Ai tha se nuk e dinte nëse anija po transportonte ndonjë ngarkesë.
Kompania britanike e sigurisë Ambrey Intelligence, tha se anija mbërriti në Mariupol më 23 shkurt dhe nuk ishte në gjendje të largohej nga ujërat e Ukrainës për shkak të mbylljes së portit./Botasot
