Vendimi për t’u ngrirë çmimi i bukës u mor dje në seancën e qeverisë, ndërsa pezullohet çmimi preferencial i energjisë elektrike për industrinë ushqimore. Qeveria vendosi për një hap të tillë pasi analizat e Ministrisë së Ekonomisë dhe shërbimeve inspektuese treguan se ka keqpërdorime.
Buka shitet me 35 denarë në Tetovë, kuë disa bukëpjekës arsyetohen se çmimi prej 35 denarësh është shkaku i gramëve të bukës. Sot në Tetovë vetëm një bukëpjekës kishte pasur bukë prej 33 denarësh por ishin harxhuar që në orët e mëngjesit.
Nga ana tjetër bukëpjekësit e Kosovës thonë se ska logjikë që çmimi të jetë aq i lartë, ata thonë se mund të sjellin bukë me çmim për 50 cent apo 30 denarë nëse bojkti mund të vazhdojë që mos shitet buka për 33 denarë në Maqedoni.
“Ne e bëjmë bukën me standard 500 gram. Nëse e bejmë si në Maqedoninë e Veriut 450 gramë, mund ta sjellim edhe për 27 ose 28 denarë, duke paguar edhe doganë dhe tatimet e nevojshme”, thanë ata.
Njëkohësisht shprehen të habitur nga reagimi i furrtarëve në Maqedoninë e Veriut të cilët kanë lënë raftet e marketeve të zbrazura për shkak të ngrirjes së çmimit në 33 denarë.
“Kjo revoltë nuk ka logjikë ekonomike, sepse çmimet e grurit në tregjet ndërkombëtare po ulen, poashtu është ulur edhe çmimi i vajit, si dhe energjenseve. Me siguri kolegët tanë janë duke e keqpërdorë pozitën në treg. Nuk e di si janë ligjet te ju, por nëse në Kosovë bëhet keqpërdorim i tillë, dënimet janë shumë të rrepta”, shprehen furrtarët e kontaktuar në Ferizaj.
Ata kanë filluar konsultime fillestare mes veti, për organizim që të “mbulojnë vakumin në tregun e Maqedonisë së Veriut”, në rast se bojkoti i filluar zgjat më shumë.
