Ish-ministri i Mjedisit, Lefter Koka, ka kundërshtuar në Apelin e Posaçëm dënimin e tij me 6.8 vite burg nga GJKKO, për aferën e inceneratorëve, duke thënë se “nuk jam unë ‘peshku i madh’”.
Koka ka pretenduar se në dosjen në ngarkim të tij ishin deklaratat e deputetes së PL, Monika Kryemadhi.
Sipas gazetares Klodiana Lala, ai tha se SPAK e përpiloi dosjen në mënyrë të tillë që ta dënonin për korrupsion, akuzë të cilën ai e mohon.
“Nuk me dënoni dot për korrupsion… E keni gabim dëgjova prokurorin sot, ky është kallëzimi i bërë nga Monika Kryemadhi”, ka thënë ai.
Lefter Koka ka deklaruar se po të hapet telefoni i Kryemadhit, aty do të gjendet edhe “peshku i madh i inceneratorëve”.
“Gjithçka thatë sot janë fiks ato që ka shkruar Monika Kryemadhi në kallëzimin e saj. Hapni telefonin e Kryemadhit dhe nuk do të më gjeni mua aty, aty do të gjeni peshkun e madh…”, tha Koka sipas gazetares Lala.
Lefter Koka në seancë: Jam i pafajshëm ju po kërkoni të më dënoni mua si peshkun e madh. Nuk jam unë peshku i madh. E di i gjithë Durrësi që unë jam biznesmen dhe nuk kam pasur nevojë të më me paguajë biletat e udhëtimit Mirel Mertiri. Nuk me dënoni dot për korrupsion… E keni gabim dëgjova prokurorin sot, ky është kallëzimi i berë nga Monika Kryemadhi.
Megjithëse ka kaluar një vit konkluzionet e prokuroreve janë të njëjta. Unë e kuptoj që institucioni do të marrë kredibilitet dhe kjo gjykatë do te jetë në presion, por besoj se do te jepni drejtësi dhe do te ngriheni ne nivelin e duhur. Pse e ndatë dosjen apo që të më dënoni sa me shume mua.
Gjithçka thatë sot janë fiks ato që ka shkruar Monika Kryemadhi në kallëzimin e saj. Hapni telefonin e Kryemadhit dhe nuk do të më gjeni mua aty, aty do të gjeni peshkun e madh…
Kujtojmë se SPAK ka kërkuar në Apelin e Posaçëm ndryshimin e vendimit të shkallës së parë, që shpalli të pafajshëm për akuzën “shpërdorim detyre” ish deputetin socialist Alqi Bllako dhe ish ministrin e mjedisit Leftër Koka, për Inceneratorin e Elbasanit.
Në seancën që u zhvillua në Apel pas dështimit disa mujor, prokurorët Klodian Braho dhe Arben Kraja kërkuan që Bllako të dënohet me 4 vite burg, në përfitim të gjykimit të shkurtuar 2.8 vite burg, ndërsa për Kokën kërkon t’i shtohet edhe dënimi për “shpërdorim detyre”.
Burimi: botasot.info
