Rrëfimi:
“Jam i martuar prej disa vitesh dhe në fillim marrëdhënia jonë ka qenë shumë e mirë. Mirëpo, kohët e fundit kam vënë re një ndryshim të madh te gruaja ime. Ajo është bërë e fiksuar pas filmave për të rritur dhe kalon shumë kohë duke i parë.
Në fillim nuk i kushtova shumë rëndësi, duke menduar se ishte diçka kalimtare. Por me kalimin e kohës, kjo gjë ka filluar të ndikojë edhe në marrëdhënien tonë. Ndihem i lënë pas dore dhe shpesh pyes veten nëse ajo nuk është më e kënaqur me mua.
Nuk dua ta gjykoj dhe as ta kontrolloj, por nuk di si të sillem. Kam frikë se kjo varësi mund të dëmtojë martesën tonë. Si duhet të veproj dhe a do të thotë kjo se ajo nuk më dëshiron më?”
Përgjigjja e psikologes:
Psikologia shpjegon se konsumimi i materialeve për të rritur nuk duhet të interpretohet menjëherë si mungesë dashurie apo tërheqjeje ndaj partnerit.
“Fakti që partnerja juaj shikon filma për të rritur nuk do të thotë automatikisht se nuk është e kënaqur me ju ose se nuk ju dëshiron. Njerëzit kanë mënyra të ndryshme për të eksploruar seksualitetin dhe fantazitë e tyre. Problemi fillon atëherë kur sjellja bëhet e pakontrollueshme dhe ndikon në jetën e përditshme apo në marrëdhënien në çift.”
Sipas saj, burri duhet të shmangë akuzat dhe qortimet dhe të nisë një bisedë të qetë me partneren.
“Mos e nisni bisedën me ‘ti je e fiksuar’ apo ‘ke një problem’. Shpjegojini se si po ndiheni ju dhe se çfarë ndikimi ka kjo sjellje në marrëdhënien tuaj. Është e rëndësishme të kuptoni edhe arsyen pse ajo po e konsumon kaq shpesh këtë përmbajtje.”
Psikologia shton se, nëse kjo sjellje shoqërohet me humbje të kontrollit, fshehje, probleme në intimitetin e çiftit apo konflikte të vazhdueshme, mund të jetë e dobishme që çifti të kërkojë ndihmë profesionale.
“Qëllimi nuk duhet të jetë ta turpëroni apo ta detyroni të ndalojë, por të kuptoni se çfarë fshihet pas kësaj sjelljeje dhe të riktheni komunikimin dhe intimitetin në çift.”
Burimi: botasot.info
