Ministria e Jashtme e Kenisë ka konfirmuar njohjen e Kosovës shtet të pavarur dhe se sot në takim në Najrobi me këtë rast është pritur në takim Begjet Pacolli – i deleguari special i presidentes së Kosovës Vjosa Osmani.
Kenia e ka njohur Kosovën në interes të paqes dhe sigurisë ndërkombëtare, integritetit territorial dhe në avancimin e forcimit të marrëdhënieve me vendet e Ballkanit, duke përkujtuar se shpallja e pavarësisë së Kosovës mori miratimin e Gjykatës Ndërkombëtare të Drejtësisë, thuhet në një postim në rrjetin X.
Në këtë drejtim, presidenti William Ruto sot u takua me të deleguarin special të presidentes së Kosovës Vjosa Osmani, Behgjet Pacolli në Shtëpinë e Shtetit në Najrobi, përfundon njoftimi.
Presidentja Osmani gjatë reagimit sot gjatë ditës ka mirëpritur vendimin e Republikës së Kenias për ta njohur Kosovën shtet dhe ka thënë se një mirënjohje e veçantë shkon për të gjithë ata që kontribuuan në këtë proces.
“Falënderim të veçantë për angazhimin e vazhdueshëm të ish-Presidentit dhe ish-ministrit të punëve të Jashtme të Kosovës, Behgjet Pacolli”, ka shkruar Osmani, pa e përmendur Begjet Pacollin se në Najrobi ka qenë në rolin e emisarit të saj special sikurse shkruan Ministria e Jashtme e Kenias.
Kenia është shteti i 118-të që njeh pavarësinë e Kosovës, pesë vjet pasi vendi i fundit që e bëri një gjë të tillë ishte Izraeli.
Burimi: botasot.info
