Një dron ende i paidentifikuar shpërtheu mbi Bullgari, pranë kufirit me Rumaninë, njoftuan autoritetet.
Sipas kryeministrit bullgar Rumen Radev, droni hyri në hapësirën ajrore të Bullgarisë nga Rumania dhe shpërtheu rreth 1,000 metra larg një stacioni kompresor të gazsjellësit Trans-Ballkanik, pranë ish-pikës kufitare Kardam, mes dy vendeve.
“Zhurma e shkaktuar nga droni u pikas nga policia kufitare rumune dhe më pas u dëgjua një shpërthim i fuqishëm nga patrulla e policisë kufitare General Toshevo”, tha ai në një konferencë për mediat.
Radev shtoi se “vendndodhja e shpërthimit të dronit u identifikua menjëherë” dhe konfirmoi se nuk pati viktima apo dëme në ndërtesa dhe infrastrukturë.
Sipas kryeministrit bullgar, autoritetet e dy vendeve nuk arritën ta zbulonin dronin teksa ai kalonte në hapësirat e tyre ajrore.
Tashmë do të shtohen operacionet e vëzhgimit në rajon.
Ky incident vjen pasi forcat rumune rrëzuan tre dronë në hapësirën e tyre ajrore brenda vetëm tri ditësh, në fund të korrikut.
Zyrtarët rumunë kanë thënë se të paktën një prej këtyre dronëve është identifikuar si i tipit Shahed, i përdorur nga forcat ruse.
Raportohet se Rumania dhe Bullgaria ndodhen në krahun lindor të NATO-s, në kufi me Detin e Zi, dhe përballen me sfida të shtuara të sigurisë lidhur me luftën e Rusisë në Ukrainë, e cila nisi pas pushtimit në shkallë të gjerë të vendit nga Moska në shkurt 2022.
Burimi: botasot.info
