Një 17-vjeçar vrau vëllain e vogël dhe prindërit në Itali, u përpoq ta mashtronte policinë

Një gjimnazist 17-vjeçar ka rrëfyer se i ka vrarë prindërit dhe vëllain 12-vjeçar në një periferi të Milanos, thanë prokurorët italianë. 17-vjeçari nuk u tha hetuesve se cili ishte motivi i krimit.

Vrasjet ndodhën rreth orës 02:00 të së dielës pas një mbledhjeje familjare për ditëlindjen e 51-të të babait të tij. 17-vjeçari mori një thikë nga kuzhina dhe fillimisht hyri në dhomën që e ndante me vëllain e tij të vogël dhe e goditi me thikë. Kur nëna e tij 49-vjeçare erdhi për të kontrolluar se çfarë po ndodhte, ai e goditi edhe atë me thikë. Më pas e ka goditur me thikë edhe babain që po përpiqej ta ndihmonte djalin e tij të vogël. 

Viktimat kishin plagë të shumta me thikë në qafë, tha Sabrina Ditaranto, një prokurore për të mitur. I dyshuari 17-vjeçar e thirri vetë policinë, por në fillim pretendoi se ai e vrau babanë e tij vetëm në vetëmbrojtje pasi e vrau nënën dhe vëllain e tij, raporton Associated Press. 

Sipas atij versioni, ai u zgjua gjatë natës kur dëgjoi të bërtitura dhe u ngrit për ta gjetur babanë e tij me një thikë në dorë pranë trupave të vëllait dhe nënës së tij më të vogël. Ai pretendoi se më pas ia kishte marrë thikën nga duart të atit dhe e kishte vrarë.

Hetuesit konstatuan mospërputhje në versionin e ngjarjes, duke theksuar se ai nuk kishte shenja konflikti me të atin në trupin e tij, shkruan ANSA. 17-vjeçari në fund rrëfeu se i kishte kryer të tri vrasjet. 

“Nga pikëpamja gjyqësore, ne nuk kemi një motiv. Nuk jep një shpjegim logjik dhe koherent për atë që ndodhi”, tha Ditaranto në një konferencë për shtyp. Ajo theksoi se i dyshuari ka përmendur një ndjenjë dobësie dhe letargjie, por gjithashtu ka thënë se kjo ndjenjë nuk ka të bëjë me ndonjë problem familjar.

Vrasja ndezi një debat për izolimin e të rinjve, pas pandemisë dhe në një epokë të dominuar nga rrjetet sociale. Ditaranto konfirmoi se kanë kontrolluar se çfarë po bënte i dyshuari në rrjetet sociale dhe çfarë lloj muzike po dëgjonte, por se me ndihmën e kësaj nuk arritën ta merrnin një pasqyrë të qartë të gjendjes së tij mendore.