Komuna e Prishtinës rifilloi gjatë ditës punimet në një pjesë në sheshin “Xhorxh Bush”. Zyrtarët komunal thanë se po e bëjnë në zonën ku është pjesë e komunës dhe nuk prek zona të mbrojtura. Megjithatë, edhe këto punime u ndaluan nga Inspektorati për trashëgimi kulturore.
Ekskavatorë, kamionë e punëtorë u panë të martën në një pjesë të sheshit ‘Xhorxh Bush’, ani pse punimet aty u ndaluan muajin e kaluar nga Inspektorati për trashëgimi kulturore, me arsyetimin për ndërhyrje të paautorizuara në një zonë ku ka asete të mbrojtura të trashëgimisë kulturore.
Punimet nga pjesa në afërsi të katedrales i ka konfirmuar edhe drejtori i Transformimit, Gëzim Kastrati. Ai tha se sipas zyrës ligjore, i kanë të gjitha të drejtat që të vazhdojnë tutje.
“Instituti ose inspekcioni nuk munden me na ndalë në pronat të cilat i takojnë Komunës së Prishtinës dhe në asnjë mënyrë nuk i atakojnë asetet e trashëgimisë”, tha Gëzim Kastrati, drejtor i transformimit në Komunën e Prishtinës
E qytetarët ndajnë mendime të ndryshme për rregullimin e sheshit ‘Xhorxh Bush’.
RTK ka provuar të marrë deklaratë nga Ministria e Kulturës, përkatësisht nga departamentet gjegjëse, por zyrtarët e tyre kanë refuzuar të përgjigjen.
Megjithatë, gjatë ditës inspektorati për trashëgimi kulturore ka ndaluar punimet e sheshit edhe në pjesën mes Katedrales dhe parkingut, pa çka se komuna ka thënë se kjo është pjesë e komunës dhe nuk rrezikon asnjë aset të ruajtur kulturor.
Ndërkaq, zyrtarët komunalë kanë akuzuar Ministrinë e Kulturës se po i ndalon punimet për çështje politike.
Burimi: botasot.info
