Gjykata Themelore në Prishtinë u caktoi masën e paraburgimit prej një muaji ndaj pesë të të dyshuarve për kryerjen e veprës penale “Krime lufte kundër popullsisë civile”.
Sipas njoftimit të gjykatës, masa e paraburgimit është caktuar ndaj të pandehurve me inicialet N.P., S.J., B.P., S.M. dhe S.S., pas kërkesës së paraqitur nga Prokuroria Speciale.
Të dyshuarit po hetohen nën dyshimin e bazuar se, në bashkëkryerje, kanë kryer veprën penale “Krime lufte kundër popullsisë civile”.
“Gjykata vlerësoj se caktimi i masës së paraburgimit në këtë çështje penale është masë adekuate, pasi ekziston rrezik real që nëse të pandehurit lihen në liri, mund të arratisen me qëllim të fshehjes dhe ikjes nga përgjegjësia penale, po ashtu duke marr parasysh se të gjithë të pandehurit janë edhe shtetas të Serbisë, ekziston rreziku real që të arratisen lehtë dhe të jenë të pa arritshëm për organet e drejtësisë, me çka do të pa mundësohet sigurimi i prezencës së tyre dhe do të pengohej rrjedha normale e procedurës penale”, thuhet në njoftim.
Burimi: botasot.info
