“Nëse duhet ta rrethojmë Kryeministrinë, do ta bëjmë”. Dita e 15-të e protestës, pas tre orësh në Bulevard, qytetarët nisin marshimin nëpër kryeqytet

Mbahet sot protesta e 15-të qytetare në Tiranë.

Qytetarët kanë filluar grumbullimin në Sheshin Skënderbej, ndërsa më pas kanë marshuar drejt Kryeministrisë, duke ndjekur të njëjtin itinerar si në protestat e mëparshme.

Pas tre orësh para Kryeministrisë, qytetarët kanë nisur marshimin nëpër rrugët kryesore të Tiranës.

Ndërsa në podium u mbajtën fjalime, aktivisti Alben Kola u bëri thirrje protestuesve të mos hidhnin flakadanë, duke theksuar se mes të pranishmëve kishte gra dhe fëmijë.

Protesta vjen në vijim të mobilizimeve të ditëve të fundit kundër projektit të investimit në zonën e Zvërnecit, si dhe ndaj politikave të qeverisë.

“Nëse duhet të flemë këtu, këtu do të flemë. Nëse na duhet ta rrethojmë Kryeministrinë, këtu do ta rrethojmë. Nëse duhet të rrethojmë Parlamentin, këtu do ta rrethojmë”, u shpreh një tjetër protestues.

Organizatorët kanë bërë thirrje për pjesëmarrje qytetare, ndërsa kërkesat kryesore mbeten dorëheqja e qeverisë, rishikimi i statusit të investitorëve strategjikë dhe anulimi i ndryshimeve ligjore që, sipas protestuesve, cenojnë zonat e mbrojtura.