Luis Enrique beson që do të ishte e padrejtë për Lionel Messin që ta përmbyllë karrierën e tij magjepsëse pa e fituar Kupën e Botës, dhe do të dëshironte që Argjentina të triumfojë në Katar nëse kombëtarja e tij Spanja eliminohet.
Messi do ta fillojë edicionin e pestë të Kupës së Botës në karrierë, kur Argjentina përballet me Arabinë Saudite të martën.
“Nëse Spanja nuk e fiton Kupën e Botës, le ta fitojë Argjentina”, tha Luis Enrique në kanalin e tij Twitch të premten. “Do të ishte e padrejtë që Messi të tërhiqej pa një Kupë Bote”.
I pyetur se kush mendonte se do të ishin pretendentët kryesorë për trofeun, Enrique shtoi:
“Brazili dhe Argjentina janë favoritët që të gjithë kanë në mendje. Franca dhe Gjermania, sigurisht. Gjithashtu, Spanja dhe Holanda si një surprizë”.
Luis Enrique bëri 12 paraqitje si lojtar për Spanjën në tre kampionate të Kupës së Botës në 1994, 1998 dhe 2002, duke shënuar dy herë.
