Në një reagim të ashpër përmes një statusi në Facebook, ish-ushtari i UÇK-së, Xhem Baruti Lamallari, ka kritikuar arrestimet e fundit të disa zyrtarëve shtetërorë, duke i quajtur të padrejta dhe të manipuluara.
Lamallari ironizon duke përmendur edhe të ndjerin ministër Eshtref Alia, duke thënë: “Edhe i ndjeri Eshtref Alia ka qenë ministër, ndoshta shkojnë e kërkojnë tek varri.” Ai gjithashtu ka akuzuar prokurorinë për paaftësi të plotë.
Sipas tij, është e turpshme që janë arrestuar ish-ministra nga vitet 2011 dhe 2012, ndërkohë që dikush si Xhevat Selami, i cili ka vetëm katër muaj në detyrë, po mbahet përgjegjës. Ai veçon si skandaloze faktin që një diskotekë ka funksionuar për 13 vite pa asnjë ndërhyrje nga autoritetet.
“Ja kanë tranu nanën në mëngjes policia ish-ministrit të ekonomisë, njëherit ambasador i Maqedonisë në Norvegji, Driton Q. Kuqi,” shprehet ai, duke shtuar se gjithçka është bërë me qëllim për të fshehur të vërtetën.
Lamallari thekson se ishte e pritshme që nuk u prekën zyrtarët lokalë të përfshirë: shefi i policisë në Koçani, komandanti i MPB në Shtip, zyrtarë të inspektoratit dhe drejtori i UJP për rajonin.
Në përfundim, ai paralajmëron se asnjë nuk do të mbajë përgjegjësi reale: “Do të lirohen pas tre muajsh dhe faji do të mbetet jetim…”
Burimi: lajme24.mk
