Shumë shpejt, pra në shtator, Gjykata për të Drejtat e Njeriut në Strasburg pritet të vendosë nëse do të “ringjallet” abolimi i ish-presidentit Gjorge Ivanov dhe do të jenë në gjyq ish-zyrtarët e OBRM-PDUKM-së të shpëtuar nga ndjekja penale dhe dënimi me burg, e që tashmë janë dënuar për rastet e hapura nga PSP.
Prej kohësh po spekulohet se pikërisht për këtë Apeli nuk po ngutet të marrë vendim për rastin “Target dhe Fortesa”, për përgjimet masive të paligjshme në DSK, pra të konfirmojë vendimin e shkallës së parë ose ta anulojë atë.
Pretendohet se po presin të shohin nëse Strasburgu do t’i rrëzojë lëndët dhe do t’i “shpëtojë” nga një vendim.
Zyrtarisht, gjykata tha për “Focus” se rasti është ende duke u punuar dhe se disa nga gjyqtarët që ushtrojnë detyrën janë ende me pushime.
Mbrojtja e Qeverisë po shkon në drejtim të dëshmimit se abolimi i Ivanovit ishte i pavlefshëm që në fillim.
Domethënë se ai iu referua një neni të Ligjit për Faljen që nuk ekzistonte prej vitesh.
“Faljet e Ivanovit janë dhënë në kundërshtim me legjislacionin vendas dhe kanë qenë zgjedhje e pasigurisë juridike dhe shkak i drejtpërdrejtë për pakënaqësi të madhe te qytetarët. Nga ana tjetër, anulimi i tyre ishte një lloj rivendosjeje e ekuilibrit të prishur juridik. Qeveria është e detyruar të mbrojë dhe përfaqësojë këtë qëndrim para Gjykatës së Strasburgut dhe përmes argumenteve të saj t’i japë gjykatës mundësinë për t’i vlerësuar ato, duke dërguar një mesazh tjetër të fortë se kjo qeveri nuk është e gatshme të shpallë kulmin e mosndëshkimit”, deklaroi ish-ministri i Drejtësisë Bojan Mariçiq.
Në nëntor të vitit 2017, avokati Vllatko Ilievski ka dorëzuar kërkesën e parë në Gjykatën në Strasburg, pasuar nga tetë të tjera, të cilat i referohen gjithsej 10 të dëmtuarve. E para është në emër të ish-kryetarit të Manastirit, Vlladimir Taleski dhe dhjetë ditë më vonë, ka ardhur ai i Edmond Temelkos, ish-kryetari i komunës shqiptare të Pustecit. Në të njëjtin muaj, në të njëjtën datë, janë dorëzuar edhe dy të tjera, nga Nikolla Gruevski dhe një bashkërisht nga Toni Jakimovski dhe Gordana Jankulloska.
Vitin tjetër, në shkurt të 2018-ës, arrin aplikacioni i përbashkët i Jankulloskës dhe Mile Janakieskit, dhe pas tre muajsh përgatitet edhe ai i Kiro Todorovskit.
Në verën e vitit 2018 në Strasburg arrin aplikacioni i ish-shefit të DSK-së, Sasho Mijallkov, ndërsa viti mbyllet me aplikimet e Janakieskit dhe Kiril Bozhinovskit.
E përbashkët për të gjithë ata është kërkesa për ndërprerjen e ndjekjes penale me arsyetimin se nuk mund të tërhiqej falja që morën nga ish-presidenti.
Në favor të tyre është fakti që Ivanov nuk u ndoq asnjëherë për abolicionin, gjë që në Strasburg lë përshtypjen se presidenti nuk ka vepruar në mënyrë të kundërligjshme.
