Sot, për të nderuar Ditën Kombëtare të Personave të Pagjetur, në Prishtinë u mbajt një ngjarje përkujtimore që solli së bashku familjarë, përfaqësues institucionalë, organizata të shoqërisë civile, aktivistë dhe qytetarë për të nderuar kujtimin e 1592 personave që ende figurojnë të pagjetur nga lufta e fundit në Kosovë, sipas të dhënave të Kryqit të Kuq Ndërkombëtar.
Ngjarja u organizua nga ProPeace – Programi në Kosovë, Nisma e të Rinjve për të Drejtat e Njeriut – YIHR KS, dhe Qendra Burimore për Persona të Zhdukur, si një moment për të reflektuar mbi dhimbjen kolektive, për të kujtuar ata që mungojnë dhe për të riafirmuar përgjegjësinë e përbashkët shoqërore për zbardhjen e fatit të tyre.
Këtë vit, ngjarja u zhvillua si një përkujtim i veçantë dhe homazh për dy figura të shquara që jetën e tyre ia kushtuan punës për të drejtën për të ditur, kërkimit të së vërtetës dhe drejtësisë për personat e pagjetur, Bajram Çerkini dhe Milorad Trifunovic, të dy themelues të Qendrës Burimore për Personat e Zhdukur ku dhanë kontribut të jashtëzakonshëm në mbështetje të familjeve dhe në kërkimin e të pagjeturve.
Ngjarja u hap nga Vjollca Islami Hajrullahu, menaxhere e projekteve në ProPeace – Programi në Kosovë, e cila theksoi rëndësinë e përkujtimit dhe bashkëpërgjegjësisë shoqërore për t’i dhënë fund pritjes dhe pasigurisë së familjeve.
Përmes fjalimeve, pjesëmarrësit ndanë reflektime personale, institucionale dhe akademike mbi nevojën për drejtësi, mbështetje të vazhdueshme dhe ndërtimin e një kulture shoqërore që nuk harron.
Pjesë e ngjarjes ishte edhe një performancë muzikore me violonçel nga Adonis Gjini, si dhe ekspozimi I fotografive të familjarëve, si një gjuhë emocionale që tejkalon fjalët dhe shërben si urë mes dhimbjes dhe shpresës.
Ngjarja u përmbyll me vendosjen simbolike të luleve te Memoriali i Personave të Pagjetur, si një akt nderimi dhe solidariteti me familjet që ende presin përgjigje.
Burimi: botasot.info
