Ekonomia gjermane do të merrte një goditje të madhe në rast të ndalimit të furnizimit me gaz rus, kanë paralajmëruar institutet gjermane.
Sipas një parashikimi të përbashkët ekonomik nga pesë institutet kryesore kërkimore ekonomike gjermane, në rast të një ndërprerjeje të menjëhershme të furnizimit me gaz rus, një total prej 220 miliardë eurosh (238 miliardë dollarë) në prodhim ekonomik gjerman do të rrezikohej si në vitin 2022 ashtu edhe në vitin 2023. Kjo do të ishte e barabartë me më shumë se 6.5% të prodhimit vjetor ekonomik të Gjermanisë, shkruan CNN, transmeton Bota sot.
“Nëse do të ndërpriteshin furnizimet me gaz, ekonomia gjermane do të pësonte një recesion të mprehtë”, tha Stefan Kooths, nënkryetar dhe drejtor kërkimi për ciklet e biznesit dhe rritjen në Institutin e Kielit për Ekonominë Botërore.
Institutet ulën rritjen e PBB-së për vitin 2022 në 2.7% nga 4.8% për shkak të luftës së vazhdueshme në Ukrainë dhe pasojave të saj ekonomike dhe presin që inflacioni të arrijë në 6.1% në 2022, shifra më e lartë në 40 vjet.
“Në rast të ndalimit të furnizimit me energji, ai madje do të rritet në 7.3 për qind, një rekord në Gjermaninë e pasluftës”, thuhet në njoftimin për shtyp.
Në fund të marsit, Gjermania lëshoi një “paralajmërim të hershëm” për mungesat e mundshme të gazit natyror mbi një mosmarrëveshje pagesash me Rusinë që mund të çojë në racionimin e energjisë, duke u kërkuar të gjithë konsumatorëve që të reduktojnë sa më shumë përdorimin e tyre.
“Procesi i rimëkëmbjes në ekonominë gjermane edhe një herë po vonohet. Tabloja ekonomike është formuar nga forcat kundërshtare, të cilat të gjitha po rrisin çmimet,” tha Kooths.
