Rusia tha të mërkurën se po tërhiqte disa trupa të vendosura afër kufirit me Ukrainën, por NATO deklaroi se nuk po sheh shenja të një tërheqjeje.
Rusia ka grumbulluar rreth 150,000 trupa në lindje, veri dhe jug të Ukrainës, duke shkaktuar shqetësime se po planifikon një sulm.
Moska mohon se ka ndonjë plan të tillë dhe këtë javë tha se po tërhiqte disa forca dhe armë, megjithëse dha pak detaje.
Këto pretendime janë pritur me skepticizëm nga SHBA-ja dhe aleatët e saj – edhe pse dukej se ulën temperaturën pas javëve të përshkallëzimit të tensioneve Lindje-Perëndim.
Të mërkurën, Ministria ruse e Mbrojtjes publikoi një video që tregon një ngarkesë treni me automjete të blinduara duke lëvizur nëpër një urë larg Krimesë, gadishullit të Detit të Zi që Rusia e aneksoi nga Ukraina në vitin 2014.
Një ditë më parë, ministria raportoi fillimin e një tërheqjeje të trupave pas stërvitjeve ushtarake pranë Ukrainës.
Por Sekretari i Përgjithshëm i NATO-s, Jens Stoltenberg tha se organizata ushtarake nuk sheh asnjë shenjë se Moska po ul nivelin e trupave të saj në Ukrainë dhe rreth saj.
“Për momentin, ne nuk kemi parë ndonjë tërheqje të forcave ruse,” tha ai, përpara se të kryesonte një takim të ministrave të mbrojtjes të NATO-s në Bruksel.
“Nëse ata vërtet fillojnë të tërheqin forcat, kjo është diçka që ne do ta mirëpresim, por kjo mbetet për t’u parë.”, tha ai.
Vendet në aleancë gjithashtu kanë shprehur dyshime, ashtu si edhe liderët në Ukrainë.
Të kapur mes Rusisë dhe Perëndimit, udhëheqësit ukrainas kanë kërkuar vazhdimisht të krijojnë qetësi, por edhe forcë gjatë krizës.
Në një shfaqje vendosmërie, presidenti Volodymyr Zelenskyy e shpalli të mërkurën (16 shkurt) një “ditë të unitetit kombëtar”. Për të shënuar këtë ditë, demonstruesit shpalosën një flamur kombëtar në një arenë sportive në Kiev.
“Ne jemi të bashkuar nga dëshira për të jetuar të lumtur në paqe. Ne mund ta mbrojmë shtëpinë tonë vetëm nëse qëndrojmë të bashkuar ”, tha Zelenskyy në një fjalim drejtuar kombit.
Ushtria ruse nuk ka dhënë numrin e trupave apo armëve që janë tërhequr.
Dhe ndërsa presidenti rus Vladimir Putin ka sinjalizuar se dëshiron një rrugë diplomatike për të dalë nga kriza, ai nuk është zotuar për një tërheqje të plotë.
Putin ka theksuar se ai nuk dëshiron luftë dhe do të mbështetet në negociatat për të arritur qëllimin e tij kryesor për të mbajtur Ukrainën larg nga anëtarësimi në NATO.
Presidenti Joe Biden tha të martën se zyrtarët amerikanë nuk e kishin verifikuar pretendimin e Rusisë dhe Sekretari britanik i Mbrojtjes Ben Ëallace tha gjithashtu se “është shumë herët për të thënë” nëse tërheqja është e vërtetë.
“Unë mendoj se ajo që ne nuk kemi parë është dëshmi e tërheqjes që është pretenduar nga Kremlini,” tha Wallace për Sky Neës.
Rusia ka mohuar të ketë ndonjë plan pushtimi dhe ka tallur paralajmërimet perëndimore për një pushtim të afërt si “paranojë” dhe “çmenduri”.
I pyetur nga e përditshmja gjermane Ëelt nëse Rusia do të sulmonte të mërkurën, ambasadori rus në Bashkimin Evropian Vladimir Chizhov tha: “Luftërat në Evropë rrallë fillojnë të mërkurën”.
“Nuk do të ketë një përshkallëzim as javën e ardhshme, në javën e ardhshme, as në muajin e ardhshëm,” tha ai./REL
