Natë zjarresh në Shkup: Digjen automjete në Gjorçe Petrov dhe Aerodrom

Dy zjarre të ndara në automjete janë regjistruar në Shkup gjatë natës mes 14 dhe 15 tetorit, ku flakët kanë përfshirë gjithsej katër automjete në komunat Gjorçe Petrov dhe Aerodrom. Fatmirësisht, në të dyja incidentet nuk ka persona të lënduar.

Rasti i parë është raportuar më 14 tetor, rreth orës 22:35, në Gjorçe Petrov. Aty ka shpërthyer një zjarr që ka përfshirë një veturë të markës “Peugeot”, në pronësi të 28-vjeçarit B.A. nga Shkupi, si dhe një automjet “Renault”, në pronësi të 47-vjeçarit M.N., po ashtu nga Shkupi.

Disa orë më vonë, më 15 tetor, rreth orës 02:55, zjarr ka shpërthyer edhe në komunën Aerodrom. Në këtë incident është djegur plotësisht një veturë “Mercedes”, në pronësi të një personi juridik, e cila ishte parkuar nga 43-vjeçari S.T. nga Shkupi. Flakët kanë përfshirë edhe një veturë “Opel Astra”, në pronësi të 43-vjeçarit I.R.

Në të dyja rastet ka ndërhyrë Brigada e Zjarrfikësve e Shkupit, ekipet e së cilës janë përballur me flakët.

Nga Ministria e Punëve të Brendshme njoftojnë se po ndërmerren masa për zbardhjen e plotë të të dyja rasteve dhe përcaktimin e rrethanave në të cilat kanë shpërthyer zjarret.