Napoli fitoi mbrëmjen e djeshme me rezultatin 3-0 ndaj Rejnxhërs në stadiumin “Diego Armando Maradona”, e vlefshme për sfidën e pestë në fazën e grupeve të Champions-it.
Golat për të kaltërit u shënuan nga një dopietë e Simeones në minutat 11′ dhe 16′ dhe një gol nga Ostigard në minutën e 80′.
Sipas faqes së statistikave “OPTA Paolo”, Napoli është skuadra e tretë italiane që arrin të fitojë 5 ndeshjet e para në fazën e grupeve të një edicioni të Champions-it, pas Milanit në sezonin 1992/1993 me Fabio Kapelon në pankinë dhe Juventusit në sezonin 2004/2005.
Një start i furishëm ky për ekipin e Luçiano Spaletit, ku përveç kryesimit të Serisë A, tashmë e gjen veten të kualifikuar edhe në raundin e 1/8-ve të Ligës së Kampionëve.
Ndeshjet e fituara të Napolit në Champions janë ndaj: Liverpulit me rezultatin 4-1, Rejnxhërsit me rezultatet 0-3 dhe 3-0, Ajaksit me shifrat 1-6 dhe 4-2.
