Ministria e Punëve të Jashtme kumtoi se e përshëndet miratimin e Rezolutës së Parlamentit Evropian për Republikën e Maqedonisë së Veriut në seancën plenare të sotme në Strasburg, duke potencuar se si deri më tani, Parlamenti Evropian dërgoi një mesazh të qartë politik për rëndësinë e përshpejtimit të procesit të integrimit evropian dhe fillimit të menjëhershëm të negociatave për anëtarësim me Maqedoninë e Veriut.
“Inkurajon fakti që teksti i Rezolutës u mbështet nga një numër i madh anëtarëve të Parlamentit Evropian, duke reflektuar mbështetjen e spektrit më të gjerë politik në kuadër të BE-së”, thuhet në kumtesë.
Sipas MPJ-së, është veçanërisht e rëndësishme që Parlamenti Evropian e rikonfirmoi rëndësinë strategjike të Maqedonisë së Veriut dhe të gjithë rajonit të Ballkanit Perëndimor dhe të ardhmen e tyre si pjesë e familjes evropiane.
“ Fillimi i negociatave të anëtarësimit dhe anëtarësimi në BE është një investim i fuqishëm për stabilitetin, jo vetëm për vendet e rajonit, por edhe për BE-në, veçanërisht në kontekstin aktual të sigurisë në Evropë. Në këtë drejtim, ne mirëpresim thirrjen e Parlamentit Evropian për tejkalimin e çështjeve bilaterale jashtë procesit të anëtarësimit, që është në frymën dhe parimet e procesit të anëtarësimit. Parlamenti e njeh gjithashtu progresin e reformave të vendit dhe gatishmërinë e tij për të nisur menjëherë negociatat me BE-në” shtohet në kumtesën e MPJ-së.
Parlamenti Evropian pasditen e sotme me 508 vota “pro” dhe 56 “kundër” miratoi Raportin e Progresit për Maqedoninë e Veriut nga raportuesi për vendin, eurodeputeti bullgar Ilhan Kuçuk, duke përshëndetur progresin e reformave dhe duke insistuar në zbatimin e Marrëveshjes për fqinjësi të mirë. Megjithatë, versioni i miratuar përfshin edhe disa nga amendamentet e diskutueshme, si ato për “pajtimin historik dhe historinë e përbashkët” me Bullgarinë dhe vlerësimin se nuk ka përparim në zbatimin e Marrëveshjes së miqësisë midis vendit dhe Bullgarisë nga viti 2017, i cili nuk është qëndrimi i Komisionit Evropian në raportin e tij të fundit në vitin 2021.
