José Mourinho ishte i pakënaqur me arbitrimin në ndeshjen Rangers-Fenerbahçe dhe shpresonte që vendimet e VAR-it të ‘mos ishin pasojë’ e finales së Budapestit, të cilën e humbi si trajner i Romës.
Finalja e Europa League 2023 vazhdon ta ndjekë Mourinhon edhe sot.
Gjatë një konference për shtyp pas ndeshjes së fundit, trajneri portugez përmendi finalen e humbur ndaj Sevillas me penallti pothuajse dy vite më parë.
Skuadra e tij aktuale, Fenerbahçe, u eliminua nga Rangers pas gjuajtjeve të penalltive, por Mourinho ishte shumë i pakënaqur me vendimet e arbitrave.
“E vetmja gjë që shpresoj është që gjithçka që më ka ndodhur në garat evropiane të mos jetë pasojë e finales së Budapestit dhe të jetë thjesht rastësi,” tha ai për BBC.
“Që nga ajo finale, që nga pezullimi im, gjërat që na kanë ndodhur – nuk luajtëm në Champions League për shkak të një penalltie në minutën e 120-të, të cilën vetëm arbitri i katërt e pa.
Sot, erdhëm këtu dhe VAR-i konsiderohet një nga më të mirët. Nuk pa një nga tre penalltitë. Shpresoj që kjo të jetë rastësi. Kam paguar për pezullimin tim dhe shpresoj që të ketë marrë fund. Lutem që kjo të jetë vetëm fat i keq.”
Mourinho pati një përballje të ashpër me arbitrin Anthony Taylor në parkingun e stadiumit në Budapest pas humbjes në finalen e Europa League 2023.
Taylor kishte injoruar kërkesën e Romës për një penallti pas një prekjeje me dorë nga Fernando në fund të pjesës së dytë.
Mourinho u shkarkua nga Roma në mes të sezonit pasues dhe u zëvendësua nga Daniele De Rossi.
Më vonë, në vitin 2023, ai pranoi se duhej të largohej nga Roma menjëherë pas humbjes në finalen e Europa League.
Burimi: botasot.info
