Policia e Lezhës ka vënë nën pranga një shtetas të shpallur në kërkim për mashtrim dhe falsifikim dokumentash.
Bëhet fjalë për shtetasin P.P., i cili mësohet se duke përdorur identitetin e një tjetër personi ka marrë një shumë monetare pranë një institucioni kredidhënës.
Në njoftimin e policisë thuhet se: “Kapet nga shërbimet e Komisariatit të Policisë Lezhë, një person i shpallur në kërkim për veprat penale “Mashtrimi” dhe “Falsifikimi i dokumenteve”.
Policia e Lezhës, në vijim të punës për zbatimin e planit të masave për evidentimin dhe goditjen e paligjshmërisë, vënien përpara përgjegjësisë ligjore të autorëve të veprave penale, si dhe të personave në kërkim, mbi bazën e informacioneve të marra në rrugë operative për vendndodhjen e një shtetasi në kërkim, ka mirorganizuar punën për kapjen e tij. Si rezultat është bërë e mundur të kapet dhe të ndalohet shtetasi:
P.P.,28 vjeç, banues në fshatin Torovicë, Lezhë.
Ky shtetas ishte shpallur në kërkim policor nga DVP Shkodër, pasi shtetasi Gj.F., ka kallëzuar se shtetasi P.P., me anë të mashtrimit, ka përdorur identitetin e shtetasit Gj.F., për të marrë një shumë monetare pranë një institucioni kredidhënës”.
Ky shtetas iu dorëzua strukturave të DVP Shkodër, për veprime të mëtejshme.
